1Ti 2 | NdeIBE | STEP | Ngakho-ke kuqala, ngiyakhuthaza ukuba izicelo, lemikhuleko, lokuthandazela abanye, kanye lokubonga kwenzelwe abantu bonke

1 Timothy 2

Imilayo ngokukhonza

1 Ngakho-ke kuqala, ngiyakhuthaza ukuba izicelo, lemikhuleko, lokuthandazela abanye, kanye lokubonga kwenzelwe abantu bonke – 2 amakhosi labo bonke abaphethe amandla, ukuze sihlale ngokuthula empilweni enhle kukho konke ukumesaba uNkulunkulu lobungcwele.

3 Lokhu kuhle, njalo kuyamthokozisa uNkulunkulu uMsindisi wethu, 4 ofuna ukuba abantu bonke basindiswe njalo balazi iqiniso.

5 Ngoba uNkulunkulu munye, lommeli munye phakathi kukaNkulunkulu labantu, umuntu uKhristu uJesu, 6 owazinikelayo njengenhlawulo yabantu bonke – ubufakazi obanikwa ngesikhathi sabo esifaneleyo. 7 Ngenxa yalokhu mina ngakhethelwa ukuba ngumanduleli lomphostoli – ngikhuluma iqiniso, kangiqambi manga – lomfundisi wokholo oluqotho kwabezizweni.

8 Ngifuna amadoda ezindaweni zonke aphakamise izandla ezingcwele ekhuleka, kungelakuthukuthela kumbe ukuphikisana.

9 Ngifuna ukuba abesifazana bagqoke ngokuchumileyo, ngokuhle lokufaneleyo, kungabi ngezinwele ezelukiweyo loba igolide loba amangqongqo loba izigqoko ezidulayo,

10 kodwa ngezenzo ezinhle, ezifanele abesifazana abathi bayamkhonza uNkulunkulu.

11 Owesifazana kumele afunde ethule langokuzithoba okupheleleyo.

12 Kangivumeli ukuba owesifazana afundise loba ukuba lamandla phezu kowesilisa; kumele athule. 13 Ngoba u-Adamu wabunjwa kuqala; kwalandela u-Eva. 14 Njalo u-Adamu kasuye owakhohliswayo; ngowesifazana owakhohliswayo wasesiba yisoni.

15 Kodwa abesifazana bazasindiswa ngokuzala abantwana, uma beqhubeka ngokukholwa, langothando kanye lobungcwele ngokufaneleyo